“1935 सेरो कायदो अन् भटके विमुक्त गोरमाटी”

“वाते मुंगा मोलारी”

भीमणीपुत्र

1935 सेरो कायदो अन भटके विमुक्त/ गोरमाटी…!

आज भटके विमुक्त/ गोरमाटीर जो दयनीय अवस्था छ, निश्चितच 1935 सेरो कायदो जबाबदार छ.ये लोक गणेर आजेर दशान जबाबदार कूण ? ये प्रश्नेर उतर 1935 सेर कायदेमं धुंडतू आये..ये संदर्भेमं इंग्लन्डेमं तिन गोलमेज परिषद हुयी.ओमं भारतीय संविधानेम कायी रेणू यादी डाॅ.बाबासाहेब आंबेडकर सादर किदेते.ओमं मुलभुत  आधिकार, अस्पृश्यता निवारण, दलितेसारू स्वतंत्र मतदारसंघ, प्रौढ मताधिकार ये मांगणीरो समावेश र. (डाॅ.बाबासाहेब आंबेडकर झाले नसते तर?..जिवन चरित्र) ये मांगणी इंग्रज मान्य कर लिदे. अन 1935 सेरे कायदेम समावेश कर लिदे.ईज कायदो भारतीय संविधानेमं डाॅ बाबा साहेब आंबेडकर समावेश कर लिदे.

पशुपातळीपं जिवन जगेवाळे भटके विमुक्त/ गोरगणेर समस्यार विचार जर गोलमेज परिषदेम हुवो वेतो तो आज भटके विमुक्त/ गोरु समाजेनं सामाजिक, राजकीय, भाषिक ये से आघाडामं घटनात्मक संरक्षण मळेवाळ र अन ये लोकुर जिवनेमं सत्ता, संपती, प्रतिष्ठाम झाकटेरो एक नवो वजाळो निकळो हुवो दकायेवाळो र.

1935 सेर कायदेती दलित आदिवासीनं घटनात्मक संरक्षण मळो अन ओनेर ‘ जगणेनं’ प्रतिष्ठा मळगी.येरो मन आणद छ. केरी द्वेष करेर मार संस्कृती छेनी.” कोर गोरुनं सायी वेस! ” आस मानवतावादी गोर संस्कृती छ.जना केरी द्वेष करेर प्रश्नज आयेनी; पणन चोर गुन्हेगार करन ‘ विमुक्त’ नामेरो एक नाकारो हुवो लज्जास्पद जिवन Rejected Life फुले, शाहू, आंबेडकरेरो जयघोष करेवाळे पुरोगामी राज्येमं स्वात॔त्र्योतर काळेम बी ये लोकगणेर हिस्सेपं आणू येरो दु:ख वाटचं. .!

स्वातंत्र्य, समता, बंधुत्व, सामाजिक न्यावेरे ये मिटेदाक नामे हेटं  विशीष्ठ वर्गेर प्रगती तो विशिष्ट वर्गेनं चोट्टी गावडी नायी पूर्वाश्रमीर चोट्टार ओळख दर्शायेवाळो ” विमुक्त ” नामेरो डिंगरो गळेम घालन एक लज्जास्पद जिवन जगे सारु बाद्य करणू इ कूणसो सांस्कृतिक न्याव..?

जे भटके विमुक्त/ गोरगणेनं डाॅ. बाबासाहेब आंबेडकर ” अॅबओरिजनल ट्राइब्ज” करन संबोधमेले छ पचं ये लोक गणेर सामाजिक मागासलेपणार चर्चा गोलमेज परिषदेम काहा वे सकी कोनी ? येनं 1931  सेर जनगणना कारणीभूत छ हानू उत्तर देयेम आवचं. ये जनगणनामं ये लोकूनं जात, धार्मिक, भाषिक  ‘ डाटा’ निर्माण करतू आयो कोनी कचं.हानू जर विये तो ये जनगणनामं इंग्रज लोक कुणसो’गणक’ वापरेम आयो , जणगणनार कार्यपद्धत सदोष कोनी विये इ के परती..? आसे प्रश्न बी निर्माण वचं. ये लोक गणैनं संविधान हक्केती वंचित रकाडे सारु आतेर प्रस्थापित व्यवस्था  / ब्रिटिश सरकार ये हेतुपूर्वक डाऊटफुल कम्युनिटीज वर्गेम नोंद किदे.संविधान हक्केतीवंचित रेयेनं जर 1931 सेर जनगणना कारणीभूत विये तो पचं एकांदी समूहेनं अनूसूचित जमातीरो दर्जा देयेसारू 1931 सेर ब्रिटिश कालीन जणगणना ये घटकेर आधार लेयेम आणू इ लादी हुयी अट इ कसेर द्योतक छ..येपरती स्पष्ट वचं क, आतेर प्रस्थापित व्यवस्था भटके विमुक्त/ गोरगणे बाबत कतरी उदासीन छ येर जाणीव वचं.

येर सारु संविधान कलम 340   आमलेम आयो छ करन केमेले छ तो पचं ये कलमे अंतर्गत नेमेहुये आयोगेर शिफारसेर अमलबजावणी करेर बंधन  राज्य शासनेन/केंद्र सरकारेन काहा छेनी?

भियाओ..! संविधान समान हक्केसारू लढेन तयार वेजावो..! आजी कतराक दन चोट्टी गावडी नायी चोट्टार ओळखीर निशाणी ” विमौक्त” नामेरो डिंगरो गळेम घालन हिंडेर छ?

येरो विचार करणो गरजेर छ..

भीमणीपुत्र

मोहन गणुजी नायिक


सौजन्य:-गोर कैलास डी राठोड

गोर बंजारा आँनलाईन न्यूज पोर्टल मुंबई महाराष्ट्र राज्य.

Tag: Banjara Live, GoarBanjara News, Lamani, Lambadi,

Leave a Reply