वटाओ साटार मोळी, बंजारा कविता कवी: अनिल जाधव

कवी: अनिल जाधव

कारखानेर मुकडदम
बांधेन आयो टोळी.
पिसा देरो कोयतान
वटाओ साटार मोळी !!१!!

मुकडदम दिनो
हारे पिळे नोटेर गट्टा.
चिल्या पिल्या लेन
तोडेन निकळे साटा !!२!!

भरलीदे पसारो ट्रकेम
छोडन जारे तांडो.
साटार मळो देकन
रेयेन झुपडी मांडो !!३!!

थंडीर दनेम सोयेर
मोटो वांदो,
पिसा फेडेन सुरू किदे
साटा तोडेर धंदो !!४!!

लाईट छेनी पांळी छेनी
वसे जान दूर.
हाट बजार दारू सारू
लाग हूर- हूर !!५!!

चिल्या पिल्या थंडीमाई
रातभर रोव.
याडी बाप ट्रक भरेन
रात बेरात जाव !!६!!

तांडो छोडन पाच मिना
रातदन गाळे घाम.
अवघड छर भिया
साटा तोडेरो काम !!७!!

कवी: अनिल जाधव
8379906085

Leave a Reply