पेनार वाणी

???? रामराम.
———————–

छीचारूरो काळ आवगो!

१ ) छीचार कतो छोरी आन छोरा.

२ ) छीचारूर वीया / वळाणो वेगो तो वो मनकीया बणं छ आन गोर भी बणं छ करन ‘ गोरगोणांं ‘ काछा.

३) मनकीयार छीचारूर वीया / वळाणो वेगो तो मनकीयारो माणस बणं छ.

आजकाल सेज बरमोडा पेर मेले छ करन छोरा कळेनी, मनकीया कळेनी आन माणस भी कळेनी.

आसे कारण बूडेठाढे लोक बोलं छ, ‘ कायीं करा भा! छीचारूरो काळ आवगो छ. हामारो कूण मानेवाळो छ. येकांध रीतेर रायी दीने तो सामळेनी, कान मार दछं. मनेरो चलावं छ आन भरोळ्यास माता लेताणी कीमी भी भडकी भडकी हींढं छ.’ यी वात कयीक टांढेमं सामळो छू. तम भी सामळे वीयो.

कायींज फरक रो कोनी करन माणस आन मनकीयारो कोयी सामळेनी. जे सामळेरो जको छीचारूर सामळते रेणू लागं छ आन गचप रेणू लागं छ. न सामळे तो कोयी पाणीर समाध लछं, कोयी वाळेर समाध लछं, कोयी झाडेर समाध लछं, कोयी वीया / वळाणो करेनी आन कोयी याडीबापेरो थडो बणा नाकं छ.

कायीं करीयां भा! जसो यीतीयास वसोज वेतो रेवाळो.

पणन यीतीयासेर बापेरो यीतीयास कतो पेनारो यीतीयासेर दाखला मळं छ.

छीचारूरो काम – मानेरो, सीकेरो आन सणेरो.

मनकीयारो काम – गोर करेरो आन माबापेर हाते हेटं नांधेरो.

माणसेरो काम – छीचारूनं सीकायेरो, मनकीयानं नंधायेरो आन रायी रीतेनं वणासेरो. कतो समण घालन पेनेबाज रायी रीत बणायेरो आन वोर परमाण सेनं चलायेरो.

कायीं करेरो आन कूं वाघेरो ? जेर जको ठराणू.

– मारतीया रामचंधीया भूकीया

गोर  गजानन डी. राठोड
प्रमुख प्रतीनिधी – बंजारा न्युज पोर्टल
वेब- www.goarbanjara.com
संपर्क‎ – ९६१९४०१३७७