जातेरो नेता , कवी: अमोल नायक

जातेरो नेता

गोल गोल का फेरारो,
आपण जातेरो नेता.
खोटोमिटो बोलं घणो,
जसो साकऱ्यारो पोता.

समाजेरे नेतान भिया,
आयेनी एकी लेंगी.
भाया भियारो सोंगधतूरो,
असो नेता मळोछ ढोंगी.

पिसा दुचु काम दुचु,
खोटे अश्वासनेती बचो.
भविष्य छोरी छिच्यारेरो,
कौडी मोल मत वेचो.

थोडादन तारकन आनं,
मते सारू फक्त तारे रोव.
निवडन जर आवगो तो,
चार साल वलंग का जावं.

विचारो जातेर नेतान भिया,
चार साल कत ऊ जावचं,
निवडणूक लागच जना,
धाटो तांडेम का ऊ आवचं.

राजा वांगु रेणोसेणो,
वापरचं कोटीर गाडी.
झुपडी तार पडरीर,
ओर चडरी माडीपमाडी.

काम करकरन भिया,
भुंजागी तारी खांल्डी.
तारो प्रश्न बाजुम रेगो,
समाजेर वेगी वकोल्डी.

तारे मतेरो जातेरो नेता,
कोरुरी चेपल वटारो.
जांगडेन निवडन लायवासू,
तू का जातेर धूड खारो.

मोल तारे मतेरो भिया,
जतलग तोन कळेनी,
मोल किदो मतेरो तो,
तारो राज तोन मळेनी.

राजकीय पक्षेपेक्षा भिया,
सामाजिक संघटना आची.
ज्ञान बढावं काम भी आवं,
तोन वाते सिखाव सच्ची.

तारो मारो जातेरो नेता,
धुंडा गोर भाई भळन.
छोड अज्ञानी जातेर पट्टी,
सामाजिक धुंडा पळन.
वैचारिक धुंडा मळन………!

©अमोल नायक
भीमणीपुत्र कटमाळो

Leave a Reply